நீங்கள் தேடியது "பல்லடம் விபத்து"

பல்லடம்:

திருப்பூர் அனுப்பர்பாளையத்தை சேர்ந்தவர் லோகேஸ்வரன் (30). கோவை பீளமேட்டில் உள்ள கம்ப்யூட்டர் நிறுவனத்தில் சாப்ட்வேர் என்ஜினீயராக வேலை பார்த்து வருகிறார்.

இவருக்கும் உடுமலை பூலாங்கிணறை சேர்ந்த பி.காம். பட்டதாரியான தமிழ்செல்விக்கும் (22) கடந்த ஒரு வருடத்திற்கு முன் திருமணம் நடைபெற்றது.

தமிழ்செல்வி தற்போது 9 மாத கர்ப்பிணியாக இருந்தார். இதையொட்டி அவருக்கு நேற்று திருப்பூர் அனுப்பர்பாளையத்தில் உள்ள கணவர் வீட்டில் வளைகாப்பு நிகழ்ச்சி நடைபெற்றது.

வளைகாப்பு முடிந்ததும் லோகேஸ்வரன், அவரது மனைவி தமிழ்செல்வி, அவரது பெற்றோர் சேகர், ஜோதிமணி ஆகியோர் காரில் பூலாங்கிணறுக்கு புறப்பட்டனர்.

காரை லோகேஸ்வரன் ஓட்டி சென்றார். பல்லடம் அருகே உள்ள அரசங்காடு என்ற பகுதியில் சென்ற போது எதிரே ஒரு கார் வந்தது. திடீரென இரு கார்களும் நேருக்கு நேர் மோதிக்கொண்டது.

இதில் காரை ஓட்டி சென்ற லோகேஸ்வரன் அவரது மனைவி தமிழ் செல்வி, காரில் இருந்த சேகர், ஜோதிமணி ஆகியோரும் மற்றொரு காரில் வந்த மணிகண்டன், தண்டபாணி, சாந்தாமணி, மனோன்மணி ஆகியோரும் காயம் அடைந்தனர்.

அவர்கள் 8 பேரையும் பல்லடம் அரசு ஆஸ்பத் திரிக்கு கொண்டு சென்றனர். ஆனால் வழியிலே நிறைமாத கர்ப்பிணி தமிழ்செல்வி பரிதாபமாக இறந்தார். அவரது வயிற்றில் இருந்த குழந்தையும் இறந்தது.

படுகாயம் அடைந்த மற்ற 7 பேரும் பல்லடம் அரசு ஆஸ்பத்திரியில் முதலுதவி சிகிச்சைக்கு பின் கோவை அரசு ஆஸ்பத்திரியில் அனுமதிக்கப்பட்டு உள்ளனர்.

விபத்து குறித்து பல்லடம் போலீசார் விசாரணை நடத்தி வருகிறார்கள்.

விபத்தில் தனது மனைவி மற்றும் அவரது வயிற்றில் இருந்த குழந்தை பலியான தகவல் கிடைத்து லோகேஸ்வரன் கதறி துடித்தார். அவரது உறவினர்களும், தமிழ்செல்வி உறவினர்களும் பல்லடம் அரசு ஆஸ்பத்திரிக்கு வந்து கதறி அழுத வண்ணம் இருந்தனர். இதனால் அப்பகுதியே சோகத்துடன் காணப்பட்டது.

பல்லடம்:

பல்லடம் அருகே உள்ள லட்சுமி மில் நேரு நகரை சேர்ந்தவர் ராமசாமி (21). டாடா ஏ.சி. டிரைவர். அதே பகுதியை சேர்ந்தவர்கள் கருப்புசாமி (23), அருணாசலம் (21). இவர்கள் 3 பேரும் நண்பர்கள்.

நேற்று இரவு இவர்கள் ஒரே மோட்டார் சைக்கிளில் பல்லடம் வந்தனர். பின்னர் ஊருக்கு திரும்பி கொண்டிருந்தனர். கோவை - திருச்சி சாலையில் சாமிக் கவுண்டன் பாளையம் பிரிவில் சென்று கொண்டிருந்தனர்.

அப்போது எதிரே சூலூரில் இருந்து கழிவு ஆயில் ஏற்றி கொண்டு மேட்டூருக்கு டேங்கர் லாரி வந்தது. இந்த லாரி திடீரென மோட்டார் சைக்கிள் மீது மோதியது.

இதில் 3 பேரும் தூக்கி வீசப்பட்டனர். தலையில் பலத்த அடிபட்ட ராமசாமி, அருணாசலம் ஆகியோர் சம்பவ இடத்திலே பலியானார்கள். கருப்பு சாமிக்கு காயம் ஏற்பட்டது.

அவர் பல்லடம் அரசு ஆஸ்பத்திரியில் முதலுதவி சிகிச்சை பெற்றார். பின்னர் மேல் சிகிச்சைக்காக கோவை அரசு ஆஸ்பத்திரியில் அனுமதிக்கப்பட்டார். லாரி மீது மோதுவதற்கு முன் மோட்டார் சைக்கிள் அந்த வழியாக ரோட்டில் நடந்து சென்றவர் மீது மோதியது.

இதில் அவர் காயம் அடைந்தார். மயங்கிய நிலையில் இருப்பதால் அவர் யார்? எந்த ஊர்? போன்ற விவரங்களை கண்டு பிடிக்க முடியவில்லை.

விபத்து குறித்து பல்லடம் போலீசார் விசாரணை நடத்தி வருகிறார்கள்.

சாமிக்கவுண்டன் பாளையம் பிரிவில் அடிக்கடி விபத்து நடைபெறுகிறது. இதனை தடுக்க அங்கு டிவைடர் அல்லது ரவுண்டானா அமைக்க வேண்டும் என பொதுமக்கள் கோரிக்கை விடுத்துள்ளனர்.

பல்லடம்:

திருப்பூர் மாவட்டம் பல்லடம் அருகே உள்ள கோட்டபாளையத்தை சேர்ந்தவர்கள் ஆறுச்சாமி (43), லோகு (40). அண்ணன்- தம்பிகளான இவர்கள் பல்லடத்தில் உள்ள பனியன் கம்பெனியில் வேலை பார்த்து வந்தனர்.

நேற்று இரவு 10 மணியளவில் இவர்கள் வேலை முடிந்து மொபட்டில் வீட்டிற்கு சென்று கொண்டு இருந்தனர். பல்லடம்- தாராபுரம் சாலையில் துத்தாரி பாளையம் மாதப்பூர் பிரிவில் வளைவில் திரும்பினர்.

அப்போது எதிரே திண்டுக்கல்லில் இருந்து கோவை நோக்கி ஒரு கார் வந்தது. இந்த கார் திடீரென மொபட் மீது மோதியது. இதில் ஆறுச்சாமியும், லோகுவும் தூக்கி வீசப்பட்டனர்.

பலத்த காயம் அடைந்த இருவரும் ரத்த வெள்ளத்தில் சம்பவ இடத்திலே இறந்தனர். மொபட் மீது மோதிய கார் கட்டுப்பாட்டை இழந்து ரோடு ஓரம் கவிழ்ந்தது.

இதில் காரை ஓட்டி வந்த கீர்த்தனன், அதில் பயணம் செய்த சதிஷ் ஆகியோருக்கு காயம் ஏற்பட்டது. அவர்கள் பல்லடம் அரசு ஆஸ்பத்திரியில் அனுமதிக்கப்பட்டனர்.

விபத்து குறித்த தகவல் கிடைத்ததும் காமநாயக்கன் பாளையம் போலீசார் அங்கு விரைந்து சென்றனர். விபத்தில் பலியான அண்ணன்-தம்பி உடலை மீட்டு பிரேத பரிசோதனைக்காக பல்லடம் அரசு ஆஸ்பத்திரிக்கு அனுப்பி வைத்தனர். கவிழ்ந்த கார் மீட்கப்பட்டது.

இது குறித்து விசாரணை நடத்தி வருகிறார்கள்.